上回講到49歲嘅江欣燕日前遇到電話騙徒，以為對方真係上海公安，欣欣好似食咗誠實豆沙包咁，如實報出自己嘅姓名、身份證同回鄉證號碼，搞咗成場大龍鳳(文章連結： http://bit.ly/2ggqnDq )

欣欣依然未知遇上電話騙徒，反而江媽媽醒目識破：「媽媽走嚟嘈，我叫佢唔好嘈，佢聽到我話同上海公安報警，佢喺另一邊廂打畀我嘅屋企人：『哎吔，佢冇睇警訊，佢畀人呃！』媽咪寫紙畀我，話呢件事係假，電話裡面嘅公安都係假，我叫佢唔好嘈阻住我，呢件事好緊急。」問到欣欣真係冇睇《警訊》？佢話：「嗰個時段我唔會睇到電視囉，而且嗰輪我要奔喪唔得閒睇新聞。」

欣欣接住話當電話轉駁到「上海公安」後，佢報上自己係香港人，資料被盜用：「我都醒問佢員工編號、口供編碼，我唔係豬頭炳！佢話要同我做口供錄音呈交上頭，問我係咪食緊嘢，可唔可以唔食住，又話我隔離好似有人嘈，我話係媽媽：『媽媽話我受騙喎！』佢叫我唔好同媽媽講先，話媽媽係老人家，佢又畀link叫我上網，仲想攞我email，我話啱新搬屋未整電腦，聽到佢噴氣聲，心諗係咪笑我呀！之後問我用乜手機？有冇wechat？話喺社交網同我聯繫，隔一陣已經有嘢send嚟，我仲諗公安局效率幾快，佢叫我上link睇網頁睇佢簡介，我見佢畀樣我睇，我咪畀番相佢睇囉，話我係呢個人，等佢再打番嚟，就係咁樣囉。佢仲叫我記住電話插住電，我仲照做，真係畀佢激死！」

最後，當對方話呢件事非常嚴重，除咗佢以外，唔好同其他人提及，以免傳咗出去，犯罪集團就知我哋點跟進，欣欣終於有懷疑：「感覺呢句好似小朋友畀人侵犯後，叫佢唔好同媽媽講。」收線之後，江媽媽話欣欣畀人呃：「我試過打番來電顯示，係5字頭，見到有啲怯，因為係電話卡號碼，打番去：『呢個電話沒有用戶登記』個心行雷，成件事係假，好驚！嗰日去中環處理完爸爸件事後，費事去中區警署咁揚，所以去西環警署報案，警察問有冇財物損失？我話冇，咁佢話你唔使報啦，唔會同你落簿，目前有太多呢啲case，唔見百幾萬都未處理到。」