這天（3日）沙田日馬最威騎師暫時係見習生巫顯東。

個幾月前才滿24歲的見習騎師巫顯東，上半場勁取一冠兩亞，下半場一開，即在第六場三班泥地一哩以何良馬房「都靈明珠」大熱門掄元，此駒單Win及組合獨贏A3分別派41.5及21.5元。

除了「都靈明珠」之外，巫顯東連同第五場泥地短途贏徐雨石的「勇冠多」，個人連勝兩場泥戰，一手包辦第五口孖寶，並以36分領先騎師王帶入第七場。

七歲馬「都靈明珠」向來特擅泥地，今場排4檔負114輕磅，當然順放，結果捱到尾險勝亞軍杜利萊座騎「家樂駿駒」短馬頭位。「都靈明珠」打開今季勝門，至今三次配巫顯東得兩冠一季，人馬合拍。值得一提，何良近四場頭馬有三場巫顯東勝出，騎練可謂合作愉快。

比賽從來有幸有不幸，年紀大巫顯東21歲，做得佢daddy的45歲老將杜利萊，今場騎「家樂駿駒」追足半條直路都追唔到「都靈明珠」，影相飲恨屈居亞軍。三、四名分別為「理想回報」及「勁哥兒」，四重彩派近一萬三千蚊。三T正獎有人中，每注派354萬幾。