珠光寶氣大團圓結局!唔係講無記套劇,而係講謝瑞麟(417)兩父子恩怨錄!謝瑞麟噚日透過謝瑞麟珠寶出通告,話唔再告佢個仔仔謝達峰,兼唔附帶何條件咁話。雖然未知係咪真係父子情仇一朝了,但肯定謝家上下,包括做夾心人多年嘅新抱,謝瑞麟珠寶主席謝邱安儀最開心。
珠寶大亨謝瑞麟兩父子嘅恩怨,講起真係幾峯迴路轉!早年阿仔爆老竇大鑊,話老頭子2008年非法提供回佣畀旅行社同虧空公款,最後搞到自己同阿爸同埋個高層齊齊鋃鐺入獄,而老謝舊年底出冊後,又走去告坐緊監嘅阿仔,話佢趁自己破產嗰陣,侵吞抵押畀瑞士銀行嘅謝瑞麟珠寶股權……總之兩仔爺實行有你無我。