一句「我有俾你x㗎！」呢幾日簡直喺網上瘋傳——當然係傳緊阿Sa蔡卓妍喺新片《雛妓》裡面肉搏任達華嗰條片(新聞連結:
http://bit.ly/1zTdfX1 )，當中阿Sa豁出去嘅精采演技，又床戰又俾任達華錫胸，就連人夫張智霖都話好有入場意欲添。

噚晚張智霖同阿Sa到中環海濱摩天輪旁出席除夕倒數活動，一聽到阿Sa部戲，佢即刻追問:「喂佢幾時上？會唔會打對台？我部《衝上雲霄》做喇喎!」話口未完，張智霖再問多次:「阿Sa嗰套幾時上先？我好有興趣喎，不過就真係唔好撞正我哋呀!」

張智霖話就話對自己部賀歲片好有信心，又係咁賣廣告，但三句唔埋，佢又話喇:「但對於阿Sa呢部戲呢，我都好有入場欲0架。」睇過trailer？呢位人夫即避重就輕喇:「因為我對阿Sa同華哥呢個配搭覺得好吸引，所以會支持。」

部戲咁激，係咪需要同老婆袁靚靚一齊睇？點知張智霖劈頭就話喇:‧「最好啦，家長指引呀嘛，依家係要老婆指引。」咁你本人又敢唔敢拍咁激嘅戲？張智霖即答:「唔怕，我都OK0架！我係一個專業演員，冇底線，你睇我拍電視都咁犀利，電影更加等緊一個徹底開放嘅機會，但都要有好劇本先得。」

咁如果老婆拍又得唔得？張智霖爽快地謂:「梗係得！專業演員嚟0架嘛，應該由藝術角度去睇，唔應該戴有色眼鏡。」你話0架！