京城年度政治大騷噚日落幕，總理溫家寶舉行記者會，係兩會最後一場重頭戲。總理記者會中外記者雲集，為咗顯示中央重視香港，慣例都會點名香港記者問一條問題，噚日有幸獲欽點提問嘅，係被稱為「香港中央台」亞視嘅李彤。

提問敏感面色一沉

可惜全香港只有一位幸運兒，其他香港記者有份舉手無緣發問，惟有各師各法。有在場人士稱，記者會後溫總離開前，一眾記者爭相上前同溫總握手，其中有線同now新聞台嘅記者，一個閃身攝到好位，將咪高峯伸到溫總面前，把握機會問問題。
據講有線記者問溫總，四川大地震死得人多，係咪因為豆腐渣工程。好多人心中都有呢個疑問，點知溫總聽到問題後面色一沉，封口唔答，變身速度快過超級撒亞人。之後now嘅記者問嘅問題，亦都好多香港人關心，就係今年係六四20周年，中央會否平反六四？對溫總而言，呢條問題可能仲激，佢直情好似聽唔到咁，匆匆離開會場。
有機會喺總理記者會上提問嘅記者，都經千挑萬選，問題都經有關方面預先過目，今年記者會冇人問政治敏感問題，可見過濾幾咁嚴格，完全滴水不漏。上述兩條足以令溫總變臉嘅問題，根本不可能在「劇本」之內，難怪溫總唔答啦。

亞視獲欽點有玄機

冇機會喺記者會上發問嘅記者，要扭盡六壬向溫總問問題，其實比起在記者會上，喺鏡頭前發問已經算容易。北京小道消息稱，過去幾日一直有傳呢個「黃金發問」花落大台無綫，點知亞視高層發功，最後一刻奪回發問權，可能早知自己得個睇字，因此無綫記者噚日打扮好平淡，而獲提問機會嘅李彤，則一早着定紅色戰衣上陣，十分搶眼。
亦有人指無綫今次失手，係因為早前外長楊潔篪記者會上，無綫已獲點名發問，冇理由連環中獎，為顯示雨露均霑親疏無別，所以噚日就輪到亞視。係咪咁簡單？又未必，台灣富商蔡衍明真金白銀救亡「香港中央台」，北京畀個人情台灣同胞，不費分毫舉手之勞，有中國特色嘅輿論導向遊戲，玩法就係咁得意。

mailto:[email protected]