細哨、卡卡嚟香港大球場踢波，原來係好多香港人嘅夢想！港台噚日公布《體育的風采》之「三個運動的夢想」網上投票，3,800幾人投票，選佢哋最想香港舉行嘅體育盛事。結果，排頭位嘅係亞運會，第二位係世界盃決賽，第三就係世界大學生運動會。
大型體育活動事務委員會主席胡曉明話，市民選出嚟體壇盛事唔係空想，香港有機會舉辦亞運，09年搞東亞運動會就係為將來搞亞運做好準備；搞世界大學生運動會亦在討論中。佢仲話，將軍澳將會有東亞運動會嘅主場館、足球學院同單車場等，加埋啓德舊機場嘅新運動設施，場地應該冇問題。
至於世界盃，如果有朝一日祖國爭取到主辦權，會唔會醒一場分組賽畀香港搞吓呢？不過決賽斷估點都輪唔到香港啦！