煮餸好叻嘅鋒味大廚謝霆鋒，除咗識煮好有鐵質嘅威靈頓牛排同毛巾雞蛋仔，前年佢真係推出過一款鋒味月曲奇，以曲奇混合傳統月餅，有價有市。

黎明啱啱喺7.1開咗個party演出後，已經返咗大陸拍劇，不過佢都好掛住香港，推出印住「明福俠」肖像嘅月餅。

黎明噚日喺facebook留言話，爸爸以前鍾意食五仁月餅，一家人會喺天台聽住收音機播「月亮光光~月亮光光~」咁賞月。今年佢自創嘅呢款「明福俠」月餅，得「紫無花果蓉配蛋黃」呢個口味，仲聲稱比傳統月餅少大約80%油份，三高人士同糖尿病人都可以放心食。

但食「明福俠」月餅又點可以咁低調呢？黎明喺訂購網站就建議配搭果酒或者紅酒，咁食呢個月餅就更加好味。