當年今日
關於我們

股路縱橫:升勢蓄銳待發林大勢衝4元 - 郭兆誠

蘋果日報 2007/10/10 00:00


港股在高位繼續大幅波動,噚日就大升大跌好幾轉,恒指高位28238,低位27491,高低相差近750點,但上上落落,夾埋就成1300點,恒指收28228,又創新高,期指個勢仲勁,高收28383,亦係新高,仲大高水155點。
大市氣勢如虹,今個月以來,6個交易日,走勢係「升跌跌升跌升」,以28000關口為中軸,大上大落,整固完之後,應該仲會升多一轉,恒指目標29500至30000點。
市場傳過北水會縮水,但其實北水已經日日係咁倒入個市,仲心急到未開戶已經想買貨,以下係真人真事:
祖兒(股票經紀):「喂……,係………,啊,陳小姐,你後日上嚟開戶口,好呀,帶齊啲資料噃。」
陳小姐(內地股民):「我已經入咗200萬入你哋間行個戶口,𠵱家幫我買住隻×××先啦。」
祖兒:「未開戶唔做得個噃。」
陳小姐:「唔該你啦,你仄下啦,真係入咗數㗎嘞,幫我買住先啦,實起㗎。」
結果如何?祖兒當然要揸正嚟做。
官方嘅港股直通車未開動,但北水就日日都已經自由行,而且數額唔細,一二百萬嘅只係濕濕碎,一千幾百萬或甚至幾千萬同一個戶口嘅都有唔少,啲錢係咁繼續嚟,後市點睇?
噚日推介中新集團(563),高收2.52元,升7.2%,短線仍以3元為目標。公司剛宣佈收購珠海一大幅地,斥資30億元,面積成221.5萬平方米,公司增加土儲,又踏出一大步,消息話年底前會陸續有來,長線可以揸實,等賺一個開。
今日推介中國林大(910),噚日升市冇份,平收2.59元,但睇個勢,已經谷得好「行」,話唔定今日,或遲多一兩日,就會破位而上,出現爆炸性上升,關鍵位2.65元,一破位就要追進,初步睇幾多?目標係4元
公司若有大動作,股價谷上4元唔難,密切留意可也。至於業績,亦會好對辦,08年度(3月年結)保守估計盈利有30億元,每股盈利0.60元,就以4元計,PE亦未夠7倍。