已故美國經濟學大師佛利民大力宣揚自由市場經濟，甚至認為連毒品亦應該合法化，因為越被禁止，地下價格就越高，最終只會益晒啲毒販，所以不如等一個合法嘅市場嚟調節。T-Bird_Money喺《MSN討論區》問：「如果美國毒品同娼妓合法化，對經濟會有乜影響？」
Herring話一旦合法化，美國好多執法人員、律師、監獄守衞、假釋官可能失業，唔少妓院老闆同毒販亦會冇得撈。美國𠵱家嘅囚犯人數係全球最多，將來少咗啲毒犯監躉，美國可能失去「全球入獄率最高國家」嘅「殊榮」！
Dang_no_name就認為：「如果將毒品同娼妓合法化，美國政府、禁毒部門同警方將無法再從毒販同娼妓身上榨取金錢，收入會少咗。」
froggyJ講，假如美國將毒品合法化，好多毒品生產國（例如南美國家哥倫比亞）嘅經濟會大受打擊，美國會被千夫所指。毒品生產國嘅毒販由於搵少咗錢，可能偷渡入美國搵食，不利美國經濟。

稅收唔會大增

不過，都有網友贊成，T-Bird_Money話：「如果合法化，毒販同娼妓就要交稅。美國政府由於稅收增加，可能會還富於民，或者調低其他稅項嘅稅率，令普羅大眾得益。」
Jewel2007就反駁：「美國政府嘅稅收唔會多好多，因為啲娼妓同毒販生性蠱惑，會千方百計逃稅。」Econstudent07講，任何從事非法活動嘅人，如果被當局揭發，佢哋嘅收入亦要交稅，所以就算娼妓同毒品被合法化，政府收入都唔會大增。
有專家話，佛利民可能唔知，毒品合法化會令吸毒人數增加，削弱社會生產力，同時增加醫療開支，令經濟轉壞。