講飲講食就幾時都係大大份先和味，但講到釣魚，Albert反而鍾意用最基本嘅魚絲釣細魚。「手指拎住魚絲，咁樣感覺有魚上釣的活動係最直接嘅，拎住釣大魚嘅魚竿隔咗層已經無咁好Feel，一味得個大力扯條魚上岸，係好攰唔係好玩，用最基本嘅工具同佢鬥智鬥力先係最過癮。」大澳涌邊水唔太深多魚仔，最啱Albert口味。

去大澳大家都會去睇棚屋，但Albert就更鍾意入屋識吓朋友。大澳人真係好熱情，每行10步都有人爭住同Albert打招呼，有次坐艇經過，盧老伯一家見到佢，同佢揮手又請佢入屋坐，就咁簡單就可以相識滿大澳。

Albert喺《自然之歌》歌頌大澳，都係以搖櫓做主題——「以木櫓，自信會穿過浪濤，網魚日子碧海似父母」，配上中國調子《茉莉花》，好襯嗰種漁村風光。搖櫓釣魚好在可以用最少嘅工具，喺深淺水處都可靈活活動。Albert要挑戰難度，仲話要攞番細個單手搖櫓加釣魚嘅絕技，咁就先要請原居民水上蜑家人示範吓啲櫓係點搖。

以前邊有咁多包裝精美嘅小食揀，最記得都係呢啲傳統地道嘅自製零食，芒果開邊去核，用糖、醋、鹽去浸，簡簡單單嘅酸甜味已好滿足。

細個無乜環保意識，捉完啲蟹仔成日諗住煮嚟食，講畀人知就笑死人，因為嗰啲招潮蟹係無肉嘅。試過入去捉蟹，撥開紅樹後見到一團黑色物體向我哋飛埋嚟，淨係識驚調頭走，後來先知嗰啲係草蚊。

將於年中推出嘅《自然之歌》，由漁農自然護理署同Albert合作，以民歌介紹10大勝景，曲中會加入海浪等天籟之聲。

大澳租船垂釣
$150/人（4小時）或$250/人（全日）
地址︰新基棚47號
電話︰94711610（梁生）

10大勝景排頭位嘅大浪西灣、東平洲同埋濕地公園，大家都好熟悉，相比第8位嘅印洲塘就比較少聽，但一講起嗰度嘅海岸公園，都應該記起佢係位於新界東北。「上有天堂，下有蘇杭」，而山水優美、人煙渺渺嘅印洲塘，就有「香港蘇杭」嘅美譽。
要俯瞰印洲塘美景，由烏蛟騰上山行約3小時去荔枝窩就最適合，沿途樹景奇特，又可以從遺迹鑑古知今，除咗開頭20分鐘上山辛苦啲，先苦後甜山路都平緩舒服。

友晟旅遊——荔枝窩、梅子林行山一日遊
日期︰3月18日
行程︰旺角洗衣街上車至烏蛟騰起步，經分水坳、梅子林、蛤塘至荔枝窩。午後經三椏村回烏蛟騰。
收費︰$45
查詢電話︰25396420

十大勝景選舉網址：www.focp.org.hk/hk88vote/tc/