自年前大陸真人騷《中國有嘻哈》推出後，Hip Hop文化喺中國冒起得好快，愈來愈多Hip Hop歌手由地底走到地面，支持者亦都越來越多。同樣因為真人騷冒起嘅周延（GAI），早前就嚟咗香港舉行首個音樂會，今次仲係佢首次嚟香港：「我真的好開心，是人生第一次到香港，都因為公司為我選了這個地方開騷。」

GAI日前喺九展接受專訪，以鴨舌帽加鬆身衫，一身Hip Hop專屬造型現身，問佢點解會唱Hip Hop？GAI表現得好坦白：「想要改變現狀，令家人過的好一點。」睇番資料，GAI曾經喺夜場酒吧唱歌，唱咗10幾年佢唔鍾意嘅主流音樂，但係私底下一直堅持唱Hip Hop：「嘻哈發展的平台比較少，沒有大眾支持，而且Rapper跟歌手不同，Rapper不能只出專輯，一定要回到現場。」佢話live先最可以體現到Hip Hop歌手嘅魅力：「我自己都最愛free style，但是我啪得比較爛，就不停的練習。其實做任何的工作都是一樣，都要不停的練習，不止我一個如此。中國（Hip Hop文化）現在都有正常的發展，都有空間，但是外國的嘻哈跟中國的不同，因為我們文化根基不同，我唱的中國味都非常的重。」

談到《中國有嘻哈》，GAI的導師係張震嶽同MC Hotdog，佢話喺張震嶽身上學到享受自由空間：「他沖浪、騎車，都會享受生活，狗哥（MC Hotdog）教了我很多技巧上的東西，怎樣讓表現更好看。」GAI雖然喺中國已經為人熟悉，不過佢話自己嘅心態冇變過：「我都是不戴口罩、大搖大擺的去超市買東西，有人會認出我打招呼。有的會比較激進，就是不經你的允許拍照，我是有點煩厭的，（成名）是幸福也是負擔，但家人在的時候，我不想被打擾。」

提到家人，今年3月佢同女友王斯然註冊結婚，GAI話：「太太是第一個聽眾，是我的忠實歌迷。我都會把寫好的歌唱給她聽，她會給我意見，但我不聽，說笑的，她給的意見都很好。」佢透露有計劃生BB，希望明年可以成真：「將來如果兒子、女兒喜歡Hip Hop都好，但我不會強迫他們，要看他們自己，他們愛甚麼我就支持，成為自己這才最重要。」

服裝：OCCUPY
髮型：Gary Cheng Of Helpmakeup

精選娛聞，喺晒《娛果》
http://fb.com/appledailyent