劉青雲、張家輝、鄭秀文(Sammi)、蔡卓妍(阿Sa)、林峯、林嘉欣、 甄子丹齊到灣仔會展，為影視博覽「2018英皇電影巡禮」宣傳，會上更宣佈未來七部電影嘅內容。

張家輝、劉青雲、林嘉欣會合演《廉政風雲煙幕》 青雲同家輝在台上以雲哥同輝哥相稱， 青雲話：「呢套電影裏面可以同好多美女合作。」家輝被問到係咩吸引拍呢套電影？佢就話：「其實我好多戲都會接，青雲就窄啲，奄尖乞人憎。」

今日大會安排青雲重與原島大地重遇， 將二人2003年合作拍攝電影《忘不了》 青雲抱住原島大地劇照展現大銀幕， 青雲記得當時對原島大地印象深刻。司儀要求青雲重演當年抱著原島大地畫面，青雲話：「我唔介意，但近日經常傳出....。」最後只係搭住原島大地膊頭合照。

青雲唔敢抱原島大地係咪驚畀人話性騷擾？青雲話：「佢都咁大個仔，佢冇話唔好，不過邊好意思呀。」仲話原島大地細個嘅時候好活潑唔使瞓，好適合做呢行。」張家輝笑言：「呢啲係精神病一種，我以前後生都試喺片場精神得滯，好痛苦。」青雲笑家輝應該係相反至啱。兩人即將喺電影裏面合作，青雲演icac調查員，家輝就會做畀人打犯人。

精選娛聞，喺晒《娛果》
http://fb.com/appledailyent