當年今日

前餅碎區文詩寸傅穎:唔通打去問人係咪撈唔掂咩?

蘋果日報 2014/05/18 06:00

區文詩stephy鄧麗欣傅穎人仔旺角Angela撈唔掂

區文詩(Angela)今早到旺角先達廣場為好友開設電訊店舖擔任剪綵嘉賓,Angela除了做幕前外,亦喜歡搞生意,舊年經營過限期明星二手店,覺得自己重心有偏則,透露下星期將簽約新經理人,主攻內地搵人仔。

一講到要經常往返內地,Angela話:「我最唔捨得啲寵物,不過有問Stephy(鄧麗欣)返內地發展意見,佢喺內地跑咗幾年,我成日問佢會唔會冇嘢食、收工有咩娛樂,佢話我點解諗呢啲,應該諗前景。」

係咪見到Stephy咁好搵,心郁郁先?Angela就話:「唔使佢講都知好搵,睇到佢近年生活質素變化,自己近年都有去內地跑show,的確好搵過香港。」

話雖如此,但同人唔同命,同樣係餅碎嘅傅穎,就有傳喺大陸撈唔掂,又遭公司棄用要搵新碼頭,Angela表示冇同對方聯絡,仲講笑話:「唔通無啦啦打去問人係咪撈唔掂咩,我諗唔係嘅,佢有佢生存之道,過去cookies成員個個都幾好丫。」

Angela早前同好姊妹吳雨霏、Stephy飛去韓國吃喝玩樂,大家都大出血使唔少錢濕平。