電盈（008）前副主席張永霖完美演繹何謂「為興趣而工作」！張永霖收藏藝術品多年，國際拍賣行蘇富比噚日宣佈，委任張永霖為董事會成員，擔任獨立董事。
68歲嘅張永霖一早搵夠上岸，佢2004年離開電盈後已經生活無憂。一般人有錢只會投資股票或買樓保值，張永霖就投資多一瓣，廿幾年前已經開始投資藝術品。
2014年香港曾經舉行國畫大師徐悲鴻嘅畫展，張永霖因此畫展接受傳媒訪問，透露佢1993年因炒股賺咗一大筆，於是將部份錢買入3幅畫以作保值之用，分別係任伯年、傅抱石同吳冠中嘅作品，從此走上收藏家之路。

同中資新股東有關

做得收藏家，肯定都係國際拍賣行嘅客仔。蘇富比董事會主席Domenico De Sole承認，張永霖係蘇富比嘅客戶，又讚佢對亞洲市場同蘇富比多個營運範疇都有獨到見解。
不過，蘇富比今次委任張永霖入董事會，都可能同新股東係中資有關。今年8月，美國證監會文件披露毛澤東外孫女婿、泰康人壽董事長陳東升斥資2.3億美元，買入蘇富比13.5%股份，成為蘇富比最大股東。
蘇富比委任張永霖做董事，同時與泰康達成協議，在符合某些條件下，泰康同意於未來3年內不增持蘇富比股份去到多過15%。

李華華
mailto:[email protected]