作為一個刁佬，要分享資本市場所見所聞的確非常不容易，並非因為起筆困難，而是太多真實情況不能說得太白，否則要不是得罪老闆、行家，就是招忌交易所或者證監會了。更重要的是，有時間寫專欄，何不見多兩個客，煲多兩個刁啦！小弟之所以堅持執筆，只希望大家明白世途險惡，在投資或者投機的路上， 做個明白人，不論贏輸都可以好自為之。

資本市場內有好多專業人士，例如律師、會計師、評估師等等，一睇個名就大概知工作內容，咁到底刁佬做咩呢？其實刁佬主要工作是召集各路專業人士，一起構思、計劃，再執行老細要求的資本交易。說穿了，刁佬就好像裝修判頭，找不同的專業技工，去幫老闆裝修個物業。

能夠召集各路人馬，刁佬的身份一般都是資本市場的活躍人士，大部份是證監會持牌中介人，參與證監會不同的受規管活動。講了那麼多，其實大部分刁佬在市場都有另一個朵，叫做投資銀行家，係咪好犀利呢？就是因為外界以為投資銀行大佬好勁，所以我們才可以用呢個朵行走江湖，當然少不免呃飲呃食、溝仔溝女、用平價去請天之驕子幫我們打工。

不過有些沒持牌的刁佬，都叫刁佬(Deal Maker)。在中環行走江湖的大哥，他們張臉就是卡片，有沒有牌對於他們的身份一點也不重要，反而無牌一身輕，毋需受監管，亦不會有太多利益衝突的限制。他們可以只是一個中間人，遊走於律師、會計師和投資銀行之間。總之，只要有老細俾錢，神刁大俠就會召集各方特種部隊開工。

到底投行大佬做什麼，其實真的好難說得明白，相信行內的朋友都發現，佢地最難回答屋企人同女朋友的問題，就是他們份工做乜。我入行超過廿年，但親朋戚友仍會以為我是炒股票為生，過時過節一定會問我有什麼「冧把」。講真，如果我炒股票就發了達，我仲洗鬼做咩！ 不要以為做投行好容易發達 ，我們同裝修、廚師，又或者其他需要工藝的工作一樣，有人發達，亦都有人趴街，行行出狀元。不過，無可否認經投行的交易銀碼都十分巨大，亦都因此令大家以為，我們賺錢不少。其實這都是美麗的誤會，交易能夠收多少錢，主要視乎交易的複雜性，越複雜、越麻煩，投行自然會收貴啲，與一般的簡單交易相比，麻煩及複雜交易的收費可高出兩至三倍，反而交易銀碼就算再大都好，如果只是簡單、直接同無鑊氣的交易， 隨時只是幾萬港元的收費，咪洗旨意老細畀多個仙你！

專欄作家簡介：
刁佬
遊走在中環黑白之間，自覺是個穿著西裝的古惑仔，在波詭雲譎的金融市場中，鑽研刀不血刃的秘訣。

探索驚奇精彩的 wONdEr 故事，請LIKE 我們的Facebook Page，並設定為「搶先看」：
https://www.facebook.com/wondermedia.hk/