C朗又晒超跑 今次呢架值2,300萬!
皇家馬德里C朗跑車基斯坦奴朗拿度超級跑車Bugatti
皇家馬德里前鋒基斯坦奴朗拿度(C朗)鍾意跑車就係人都知,咁佢錢多到使唔晒,亦係一個事實。咁賺埋賺埋咁多錢要嚟做咩好呢?梗係買下嘢喇!所以C朗最近又買咗架靚車,仲要係超級跑車嚟。
C朗最新喺自己社交網站晒嘅新車係Bugatti Chiron,相信價值250萬歐元,即係2,300萬港紙左右。呢位葡萄牙國家隊隊長喺影片入面形容自己嘅新座駕做「全新嘅野獸」,即刻睇下佢到底有幾巴閉。根據資料,Bugatti Chiron係2016年先開始生產嘅,全球限量500架,其實係Bugatti Veyron 16.4嘅繼任車款。Bugatti Chiron用嘅係四渦輪增壓引擎,馬力達到1,500匹,係一架四輪驅動嘅雙門超級跑車。
喺性能方面,Bugatti Chiron可以喺2.5秒內由靜止加速到時速100公里、6.5秒內由靜止加速到時速200公里、13.6秒內由靜止加速到時速300公里。Bugatti Chiron理論上嘅極速係時速463公里,不過因為安全考量,極速其實係set咗喺時速420公里嘅。Bugatti Chiron其實係一架相當「食油」嘅車嚟嘅,據報喺極速行駛嘅時候,八分鐘內就會耗盡100公升嘅油箱。不過咁,要搵到一條可以連續八分鐘行時速420公里嘅路嚟喪劈呢架Bugatti Chiron,相信都唔係一件咁容易嘅事!