細個有睇成語動畫廊嘅戰友，相信對瞎子摸象呢個成語唔陌生，簡單啲講，一個盲人接觸象鼻、象腳、象耳、象尾，對象嘅了解都會有所不同。噚日嘅港股，正正係瞎子摸象嘅翻版。你炒內銀股同基建股，會話港股處於大牛市，勢不可擋；你炒券商股，會話港股係過山車市，chok到爆；你炒濠賭股及新經濟股，會話港股熊市來臨，輸死人冇命賠。一個股市有咁多種體會，好聽啲就係多元化，實情就係越炒越窄，天堂與地獄只差一線。

大股東增持的啟示

每個人都會有唔同嘅第一次，例如普通人會第一次拍拖（即係初戀），歌星會第一次開演唱會，演員會第一次做影帝，球員會第一次入波，各式各樣，但全部都有象徵意義。股市呢？作為一間公司嘅大股東，首次增持絕對值得關注。大自然家居（2083）大股東佘學彬，最新就獻出咗佢嘅第一次。股權披露資料顯示，佘學彬上星期四及五，連續兩日增持公司股份，平均價介乎1.11至1.13元，為上市以來首次，金額唔多，一球錢左右。再睇大自然家居資料，真相大白了，市盈率唔夠10倍，PB六折有找，息率13厘，現價較52周高位平足兩成半，近日剛剛有突破下降軌之勢，後市睇升定睇跌？相信大家心中有數！

唐牛
https://www.facebook.com/tongcow88