沙田馬場明午（2日）七泥三草賽事，焦點落在泥地賽上，一向認為泥地馬最重要是當頭起，有近績支持，及有硬淨騎師助陣。

揀馬方面不會太難，個人喜歡第七場「金湶德」及第八場「冰糖葫蘆」，集合上述主要因素，可以睇高一線。

第八場三班泥地1650米：「冰糖葫蘆」性能已認定泥地最合跑，同程四戰獲兩亞一季，今季三戰俱跑1200米，上仗12檔起步刻意拖到最後，直路從馬群堆中穿插而上壓倒實力指標「真好漢」贏馬，姿態相當嚇人。

再睇分段時間，屬偏慢場合，能夠交出令人吃驚的追趕力，除話評分太過着數之外，泥地性能實在超卓，亦是可解讀原因之一。

「冰糖葫蘆」今戰距離上仗三個星期，賀賢罕有地安排此駒剛周二（11月27日）試閘作最後試跑，拉士50米見鞍上人巫顯東稍為一鬆，即將「醒目再臨」趕過，狀態肯定比上仗贏馬時猶有過之。

再查12月中及尾都有三班1200米賽程，賀賢寧願讓此駒增程跑今場一哩，動態已顯示添食決心。