有錢就是任性嘅方法有好多種，但好似中超班霸廣州恒大呢種，就真係好難識得欣賞。南韓次級聯賽K2球隊富川聯周四宣佈，前全北汽車亞冠冠軍成員金亨鎰由恒大加盟。球員去留本來好平常，但呢位據報年薪高達750萬美元（約5,850萬港元）33歲前南韓國腳守將以自由身加盟恒大半季，只係踢過一場熱身賽，正式賽事零出場就袋走最少375萬美元（約2,925萬港元），認真和味。

咁樣倒錢落海，其實又唔怪得晒恒大，因為金亨鎰去年冬季轉會窗加盟，本來係打算代替重傷嘅另一南韓守將金英權，點知佢嘅操練表現完全唔對辦，加上中國足協年初無啦啦推出「三外援」新政，對於擁有中前場「巴西三寶」荷西保連奴、列卡度高拉特同阿倫卡華路嘅恒大嚟講，惟有犧牲金亨鎰坐冷板，被迫「硬食」呢單最失敗收購。