鷹君（041）爭產案續審，羅老太羅杜莉君連續第五日接受辯方滙豐信託大律師盤問，羅老太承認，在2016年要求滙豐將信託中全部財產拿回，覺得自己是有權這樣做，因為嘉瑞從中作梗，「夾埋滙豐」：「佢（滙豐）唔聽我話，我有權拎，但滙豐又唔畀我。」

大狀質疑，羅大太認為滙豐偏幫嘉瑞，是因為信託不聽從老太指示，老太解釋：「我覺得乜都係佢（嘉瑞）阻止，依家都有啲啲幫啦，即係我講乜都唔聽，淨係聽嘉瑞講。」大狀問有沒有其他事實證明滙豐偏幫，老太就指：「滙豐做乜都唔聽，無人控制，點會唔聽我話。」

庭上大狀呈上律師樓信件，關於老太要求以不高於29元，每日購入鷹君20萬股。大狀問到信件由誰擬定，老太則指「幫我嗰2，3個仔」，後指二子旭瑞、六子啟瑞有參詳。而大子孔瑞，兩名女兒都有幫忙。

庭上亦說出一段，2016年4月12日，來自羅老太與滙豐信託的前董事總經理Paulina Lau的電話對話節錄

P：Paulina Lau
羅：羅老太

（首先電話由傭人接聽，最後傭人交由羅老太接聽，一開始主要提及老太復活節行程、之後提到咳嗽、燉川貝、雪梨一事）

P：你噚日寄咗封信畀我，依家話番畀你聽。你叫我用信託嘅錢買股票。有無原因買呀。
羅：叫你買幾多，我唔得記得咗。
P：你同我講每日買20萬股。
羅：日日買呀？
P：係呀，你知唔知買邊度？
羅：唔知呀，等我諗吓先。
P：你叫我買鷹君股份。
羅：係咩？
P：係呀，每日買20萬股呀，信託做咗咁多年，都未叫過我買，我咪問清楚。
羅：等我諗吓先，再打畀你。
P：因為都要知，有咩特別原因要增持股票。

但羅老太否認有關對話，「依啲咁嘅閒話，我都無聽過」、「我無同佢talk過」、「我真心無講過」、「唔記得就唔記得」。

記者：梁延宇