蔚雨芯連續2年做業主 斥840萬投資西九龍新盤成小富婆
蘋果日報 2021/03/15 21:37
蔚雨芯藝人買樓
歌手出身的蔚雨芯（Rainky）早年在香港發展普通，機緣下北上搵食轉戰演戲，早已賺到第一桶金，在疫情下有見事業停滯，她膽粗粗與友人合資百萬搞美容生意，還親身上陣做生招牌，並經常在社交網上晒性感身材派福利，延續她出道時「魔鬼胸」的稱號。Rainky在美容行業打滾短短時間已賺大錢，她去年升呢做業主，豪擲770萬買入將軍澳樓盤，事隔1年，Rainky再做業主，今次和生意拍檔合資買樓，看準疫情之下有危有機，2人睇中西九龍「維港匯I」新樓盤，幸運地可以中籤揀樓，選購了840萬元的一房單位，向圈中小富婆進發。
Rainky今次買樓主要作投資，看好地理位置有升值潛力，明年才會收樓，預計之後會放租，幾年後有斬獲時就會放賣單位。Rainky對投資物業一直有興趣，她回覆傳媒查詢時透露：「目前畀心機做美容品牌生意，努力供樓投資，今次層樓主要是投資不是自住，將來都會睇定樓盤入市，順其自然。」她和友人最初預算為750萬左右，但到揀樓時已經沽清，最後才揀了840萬單位，未來日子Rainky孭兩層樓需財力十足，她笑言要加快步伐搵錢。
此外，Rainky曾被指有位馬來西亞「富二代」男友，早年更有傳準備做千億新抱和公司解約，事實上她當時突然富貴，不時作浮誇打扮變靚啲，身上還有不少名牌，不過她一直否認蜜運，「傳聞是好耐歷史的傳聞，目前單身。」
蔚雨芯再次買樓成業主，並與好友展示樓盤資料。（IG圖片）
蔚雨芯擁「魔鬼胸」，非常着重身材，不許肥肉加身。（IG圖片）
幾年前突變小富婆一身名牌。（IG圖片）
蔚雨芯外貌也漸漸變靚。（IG圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！