當年今日

幸福三代同堂家常小菜慶團圓

蘋果日報 2002/02/09 00:00


中國人過新年,最重要係一家人聚首一堂。我哋嘅忠實讀者林生話「可以享仔福,又有孫女湊,比起食翅重開心。」林生為大家示範四味佢嘅家鄉團年經濟菜,菜式雖然簡單,但賣相精緻而且全部都好有意頭。林生連同佢嘅家人率先同大家拜個早年,祝大家花開富貴、金銀滿屋。

記者:陳冰麗 
攝影:伍慶泉
花開富貴
主要材料有西蘭花,其餘有花膠、海參等,雖然無鮑翅咁矜貴,但都算有睇頭,取其花開富貴。而傳統西蘭化伴帶子,林生則改以鵪鶉蛋取替,賣相更精緻,小朋友都會鍾意。

材料:
西蘭花1棵
冬菇8隻
禿參1-2隻
鵪鶉蛋10-12隻
火腿2-3片
花膠1-2件

製法:
1.西蘭花洗淨,切件,以油鹽水烚熟,瀝乾水,放碟邊。
2.冬菇洗淨,浸軟,剪去菇蒂,留汁。
3.鵪鶉蛋烚熟,剝去殼,放西蘭花旁。
4.花膠、禿參切件,連同冬菇、火腿及蠔油一齊燜至腍身入味,盛起放碟中。
禿參花膠處理:
1.煲滾水,放入禿參滾約20分鐘,熄火焗一晚後浸清水待發脹,其間要不斷換水,直至海參鬆軟及發大,再以清水洗擦禿參表面,𠝹開海參,刮去腸及沙粒,洗淨後即可以配合其他料烹調。
2.花膠用清水浸一日後放入一煲滾水內焗直至水變冷,即換過清水再浸,重複多次至花膠軟身。
添丁發財
慈菇有添丁之寓意,新春前後產量最多。髮菜諧音「發財」,兩者加埋即添丁兼發財,慈菇更有防治便秘及增進食慾作用,新春食滯咗,食番啲經濟嘅慈菇都唔錯㗎!

材料:
慈菇3-4個
髮菜1-2両
中國芹菜1棵
臘肉、臘腸各適量

製法:
1.慈菇、臘肉及臘腸分別洗淨,切片。芹菜洗淨,切去根部,其餘切段。髮菜浸透,瀝乾。
2.燒熱油,爆香臘肉及臘腸,加入慈菇一齊炒,最後加入芹菜及髮菜兜勻,以鹽、糖、醬油各少許調味即可以。
小貼士:
1.慈菇本身有種苦澀味,炒時最好加少少糖,食味會更佳。
2.可用日本髮菜(水雲)代替髮菜,同樣有質感,日式超市有售,價錢平好多,500克大概四、五十蚊。
年年有餘
林生話新春可以唔食鮑魚、魚翅,但必定要有魚,年年有餘(魚)至有錢剩。而佢家鄉煮魚則鍾意配以豆腐一齊煎煮,清清哋比較適合老人家食。

材料:
鯇魚尾1條 豆腐1-2件 薑片、葱段、芫荽各少許 麫豉醬1湯匙

製法:
1.鯇魚尾洗淨,吸乾水。豆腐略洗,切件。
2.爆香薑片,放入鯇魚尾煎至兩面金黃色。
3.燒熱少許油,將豆腐亦煎香,放回鯇魚尾,加入麫豉醬及少少水一齊再煮至滾,撒上葱段及芫荽兜勻即可以。
金銀滿屋
呢個餸非常清淡,而且又經濟,以銀芽(芽菜)及雞蛋為主要材料,取其又金又銀,祝願大家可以金銀滿屋。唔想食得咁肥膩,可以考慮吓呢個餸。

材料:
銀芽1斤 雞蛋2-3隻 粉絲1小包 蝦米2-3両

製法:
1.銀芽洗淨,瀝乾水,備用。
2.雞蛋拂勻,以少許油煎成薄片,再切條備用。
3.粉絲、蝦米分別浸軟,瀝乾水,備用。
4.燒熱油,爆香蝦米,加入芽菜略炒,倒入粉絲,加少許鹽及水煮至汁收乾,盛起以蛋絲鋪面。