當年今日
關於我們

簽約有線無懼得罪TVB
君如自封社長專跣新主播

蘋果日報 2003/06/24 00:00


吳君如動筆簽約有線,加盟將於下月啓播的有線二十四小時娛樂新聞台,帶領十二位新主播報道娛樂新聞。據知有線睇中她敢言,不過君如卻自言很怕得罪人,更笑稱敏感的批評,會留給年輕主播講。
有線二十四小時娛樂新聞台將於下月啓播,早前已物色到五男七女年輕主播,另外還要找兩位資深娛樂圈一男一女藝人加入,帶領新主播報道娛樂新聞。

「每星期做兩日」
其中吳君如已落實簽約,至於另一位男藝人,則還未落實,據知曾志偉正傾洽中。吳君如簽約有線,不怕得罪大台無綫嗎?君如前日接受本報電話訪問時說:「我同有線娛樂新聞台簽咗半年約,每星期做兩日,價錢合理囉,又唔影響我做電台。」
君如續說:「我覺得有線今次唔係純八卦,有多啲角度去做娛樂新聞,對我嚟講幾有挑戰性,我都想試吓。我本身冇同任何電視台有合約,同無綫亦冇乜交情,所以冇話得唔得罪,最多以後我有戲上,無綫唔會訪問我囉。」
君如將要帶領新主播,她說不怕被青春靚女主播比下去,她說:「互相切磋啫,我不嬲認老㗎,冇所謂。呢班新主播好有潛質,但係欠缺經驗,如果我冇價值,就唔使搵我啦,我對自己有信心㗎。我嘅角色就係做社長,好似報紙政評咁,評論吓啲娛樂新聞。」

「踩人係最低招」
問君如可怕得罪藝人?她說:「怕㗎!我做電台節目,人哋覺得我敢言,其實我都係講大是大非嘅嘢啫,我驚令到其他藝人唔開心㗎,我自己係藝人就最了解。其實我都冇乜撩過藝人啲嘢嚟講,到時有嘢嘅,咪留返畀啲主播講囉。好似講謝霆鋒咁,我未必要得罪佢㗎,可以轉一個角度講,踩人係最低招嘅。」
採訪:張止寒
empty
有線高層徐小明(後排中)早前帶領新主播見傳媒。 資料圖片