蕭敬騰（老蕭）近日遭「活蟲溪錢信件」恐嚇，今日喺台灣佢抱住愛犬去到電視台，為電視節目《SuperStar我要當歌手》錄影，佢話最近變得神經質，有愛犬喺度可以幫佢定驚。

老蕭喺經紀人同兩名保鑣陪同下受訪，神情肅穆，工作心情明顯受影響，老蕭話：「我盡量不讓自己往事件裡面鑽，不然會很複雜，如果警方需要我做筆錄，我全力配合，也希望整件事趕快有結果。」

去年10月底先至被潑屎，雖然人身安全亮紅燈，但係蕭敬騰堅持唔搬離南港住宅，佢話：「該搬的人不是我。」

蕭敬騰話唔覺得自己衰運纏身，會繼續奮鬥，工作唔會停止，佢話：「我會禱告，內心力量要夠強大，如果想自己很衰，會愈過愈不好。」對於佢爸爸會否擔心，老蕭保持幽默：「不會，我爸自己都想進演藝圈了。」

撥屎案仍然調查審理，老蕭話雖然自己為事件着急，但對於普通巿民而言，只係小事一則，要依程序處理，加上近日唱片公司收到嘅活蟲溪錢信，老蕭話：「還是要靠警方幫忙，不能光憑我的猜測，我也不能多講什麼。」

曾經係蕭敬騰超級粉絲嘅日籍富家女蔭山友紀(Yuki)，諷刺蕭敬騰唔係好人，同場嘅邱瓈寬怒罵：「社會就是有這種敗類，有病就要看醫生。」

而老蕭嘅經理人Summer認為，收到恐嚇信嘅唔係老蕭本人，係唱片公司工作人員，所以如果搵佢哋去警署落口供只是浪費時間，事件只能夠交由警方拆解。