當年今日
關於我們
中環在線 滙豐紀勤:唔止幾勤要好勤 - 李華華
蘋果日報 2007/05/22 00:00
靠香港起家嘅獅子銀行,一眾英國大班,對中華文化素有研究,除咗前主席龐約翰識用過曹操名句「老驥伏櫪,志在千里」,現任「二班」行政總裁紀勤都唔弱,佢噚日對數百香港股東笑言,知道自己中文譯名意思係「幾勤力、幾勤奮」;佢更加清楚,股東期望佢,要做到「好勤力同好勤奮」。
一向視本港為福地嘅滙控,梗係睇好呢度,佢話,香港安然度過亞洲金融風暴,又克服SARS,背靠祖國,面向世界,相信回歸十年,標誌住邁向更美好嘅下一步,套用煲呔金句:想窮都難。
佢以AK47掃射嘅速度,喺23分鐘內,答咗10幾條記者提問,效率一絕。不過,對住一眾「米飯班主」──滙控大小股東,佢就耐性好多,仲詳細講解集團未來策略。
點解分行冇表攞
香港小股東有時幾搞嘢,好似噚日「開齋」嘅女士,就問紀「二班」,點解滙豐美孚間分行,冇得攞招股表,搞到佢要去獅子銀行嘅策略夥伴──交通銀行度至攞到表格。
吓,人哋係管緊全球82個國家業務嘅行政總裁,點答呢個細眉細眼嘅問題?於是交咗個波畀滙豐亞太行政總裁邵銘高,肥仔邵好話唔好聽,都睇晒亞太區十幾廿個國家嘅業務,佢講笑話,想再彈畀滙豐銀行執行董事王冬勝答,不過佢最後都回應,話會就小股東提問檢討研究,再行答覆。
[email protected]