名模周汶錡（Kathy）、樂基兒（Gaile）、等今日現身澳門出席酒店開幕禮。周汶錡雖然係兩子之母，但身材依然FIT到漏，一襲低胸裙非常搶鏡。提到父親節即將來臨，佢話會幫手畀驚喜老公，佢話﹕「囝囝太細，得兩歲同一歲，應該會一家人食餐飯。」

至於暑假，Kathy就話未plan好節目，佢話﹕「應該會同老公帶大仔返法國，帶埋細仔會太吃力，佢太細未能enjoy，雖然對細仔好似唔係咁公平，但都冇辦法。」

而樂基兒就着咗一條單膊露肩裙，手臂好肉感，佢透露最近開咗一間公司搞製作，忙到連飯都冇時間食，佢話：「主要拍吓煮嘢食，瑜伽短片，啱啱都拍咗一個有關美容產品嘅短片，教人點化妝同畀啲貼士，第一條片都啱啱上咗IG。」佢話唔係想做KOL，只係想做幕後，畀人睇到自己另一面。

精選娛聞，喺晒《娛果》 http://fb.com/appledailyent