【新增動新聞】

NBA轉會市場風起雲湧，又爆出震撼性消息！據美國傳媒可靠消息報道，快艇明星前鋒比歷克格芬（Blake Griffin）選擇跳出合同，放棄執行來季2,140萬美元嘅球員薪酬選項，將會成為非受限自由身。《ESPN》更報道指，控衛基斯保羅（Chris Paul）亦有意跳出合同成為非受限自由身，只係會留待下周四（29日）期限屆滿前先作出決定，係咪試水溫都好，去向令人無限瑕想！

格芬喺2009年獲快艇以「狀元籤」揀中，CP3到2011年亦由新奧爾良黃蜂加盟，但兩人合作6季以來，始終未能帶領球隊殺入西岸決賽，包括過去一季受格芬腳趾受傷影響下，最終首圈以場數3:4不敵爵士出局。現年28歲嘅格芬過去一季場均取得21.6分、8.1籃板，亦係5屆明星賽成員；至於聯盟頂尖控衛、32歲嘅CP3去季交出18.1分、9.2助攻，兩人仍然為個人首隻冠軍指環而努力，其中同格芬扯上關係嘅包括火箭、塞爾特人同熱火，而尋求羅致控衛嘅馬刺就對CP3興趣甚濃。不過，早前有報道指快艇將會不惜工本開出頂薪留人，其中CP3最高可獲5年2.05億美元（約16億港元）合約，前入樽王格芬亦可獲5年1.75億美元（約13.6億港元）。

至於CP3呢日都有新聞，不過唔關轉會事，而係周五球員工會年度會議上再度獲選為主席，展開4年任期嘅佢表示：「我對自己獲得同儕認可續任工會主席表示榮幸。我哋過去幾年達成好多目標，包括成功商討新嘅集體談判協議（CBA）而避免『封館』，但未來仲有更多事情要做。」其餘行政委員會成員包括勒邦占士、占士鍾斯、安東尼、史堤芬居里、加素、伊古達拉同杜利華，唯一變動係帝王後衛譚普（Garrett Temple）取代騎士射手高華（Kyle Korver），未來3年出任副主席。