當年今日
關於我們

【電影唔夠喉】《捍衛者聯盟》今日首播 Marvel搭Netflix踩入電視界

蘋果日報 2017/08/18 21:12

特工卡特捍衛者聯盟Luke CageIron FistmarvelJessica Jones夜魔俠神盾局特工Netflix

近十年吹起嘅超級英雄電影風潮要講起就真係要多謝Marvel,眼見賣咗版權俾Sony嘅《蜘蛛俠》咁成功,當年面臨破產嘅Marvel拼死一博拍咗套《鐵甲奇俠》,藉此打開超級英雄之路,年年都有之餘仲出埋大雜燴《復仇者聯盟》,演員越拍越紅,到今時今日真係無人不知無人不曉。
不過Marvel喺電視劇集上面對比起老對手DC就真係弱咗少少,見DC喺2012年推出《綠箭俠》取得成績後,Marvel隨即諗住跟埋電影熱,推出咗套《神盾局特工》,由電影配角嘅特工做主角擔正,播出以嚟一路都係聲勢平平,2015年播出由電影中美國隊長喺未冰封前嘅女友做女角嘅《特工卡特》就更加麻麻,只係播出咗兩季就摺埋。
好彩Netflix幫Marvel爭返啖氣,由2015年起Netflix幫Marvel拍攝街頭英雄電視劇,首先拍攝嘅就係以盲人律師做主角嘅《夜魔俠》故事講述一名自幼因為意外被化學液體濺落雙眼至盲,但係意外加強其他感官嘅律師,日間就幫平民打官司,夜晚就變裝去打擊罪惡。《夜魔俠》播出後獲全球觀眾一致好評,紅到連大台都要參考。
喺《夜魔俠》成功後好快Netflix就再推出第二季,之後更推出同樣以紐約市為背景,中學時係蜘蛛俠同學嘅《Jessica Jones》,故事就講一名擁有神力嘅女偵探被心靈控制,喺脫困後嘅心理鬥爭同埋復仇之戰,而同時Marvel就宣佈除咗呢兩套劇集外仲會有其他角色登場,而各個劇集更加會有交雜。
好快Netflix就推出咗刀槍不入力大無窮嘅《Luke Cage》以及因為幼年飛機失事跌入位於喜瑪拉雅山異空間「崑崙」,學成一身武功嘅《Iron Fist》,兩者同樣哋喺美國紐約變成街頭英雄,而Marvel更宣佈四人會組成《捍衛者聯盟》,一齊守護紐約。
《捍衛者聯盟》本來喺漫畫中就係一群守護紐約而組成嘅英雄,其中成員除咗今次劇集中嘅四位之外仲包括蜘蛛俠,而Marvel亦話過Netflix劇集中嘅世界係同電影世界相連,咁係咪即係話蜘蛛仔有機會喺劇集中出現呢?《捍衛者聯盟》今日就已經喺Netflix開始播放,一共八集,而未來就仲有喺《夜魔俠》第二季之中獲大讚嘅《制裁者》獨立劇集會推出。