【本報訊】o靚模殺入書展，出寫真集之餘又大搞簽名會，勢必吸引大批電車男逼入會展追星，有網民擔心o靚模效應下，會嚴重滋擾書迷及擾亂會場秩序，於是號召網民在下周三書展舉行首日到會場外靜坐示威；他們又要求貿發局為o靚模設立專區，減低追星族對書展滋擾。貿發局昨匆匆補鑊，表示會開放兩專區予名人舉行簽名會。
網上反o靚模群組主腦之一張振海（Isaac）昨舉行記者會，強調自己不是「反o靚模」一族，但又指o靚模在書展舉行簽名會勢吸引大批追星族，令原本已人山人海的書展會場更逼更混亂，「啲人又嘈，真係好影響去書展買書同睇書嘅人。」他指，會號召網友在書展首日的下午，在金紫荊廣場靜坐半小時，要求貿發局另闢場地予o靚模舉行簽名會。
貿發局發言人昨表示，會因應不同意見檢討書展安排，為疏導人流，今屆書展採取特別安排，在新翼四樓及博覽道入口大堂設立兩個簽名專區，以減少對進入書展人士影響。發言人表示，設兩個簽名專區是因為會展中庭已完成擴建，所以能有更多空間予書商舉辦活動，強調專區不是為o靚模而設。