超人李嘉誠今日最後一次以主席身份主持長和（001）與長實地產（1113）股東會，之後就正式退休。為咗見證呢個歷史時刻，唔少小股東都打算去會一會超人。
股東會中午後喺超人旗下九龍海逸君綽酒店舉行，往年約有千名小股東出席，聽講，公司預咗今日多幾百人到。

加開中西餐廳應付

由於開會場地有限，只能容納約500人，以往其他股東被分流到酒店內嘅中餐廳，邊食邊睇電視直播，為應付人流，公司今次會開埋西餐廳，總之保證各位股東有位坐有得食。
講開又講，今日可能係好日子，恒生銀行（011）與小小超李澤楷旗下電盈（008） 亦於下午舉行股東會。恒生一向多長情小股東捧場，以往基本都有2,000名股東出席，同時揸住恒生與長和嘅小股東，要留意時間喇。
根據天氣預報，今日多雲有驟雨，提提各位小股東，尤其係老友記，要提早出門呀，而且聽聞早到有着數，就係若然同時持有長和與長實股票，早啲到（最好11點左右），職員可以為你一次過做好兩隻股票嘅登記手續，咁就唔使再為3點舉行嘅長實股東會排多次隊嘞，早到實冇壞啦。

李華華
mailto:[email protected]