朱鑑然日前接受電台邀請參加節目，測試防水產品，對呢位飛魚王子嚟講，就最適合不過。測試過程，當然要喺水中進行，朱仔有大把時間騷佢一身健碩肌肉，同場女主持都忍唔住大讚。

話晒都係前香港游泳代表隊，當然有過唔少水中拍攝經驗，就連朱仔自己都話：「可能我真係太熟水性，感覺喺水入面拍攝係特別得心應手，覺得係屬於自己嘅環境，自然放鬆啲，又好玩啲。」如果演一個同游泳有關嘅角色，朱仔覺得自己亦會更易上手。

再到游池拍攝，令朱仔諗此唔少以前參加比賽同練水嘅往事，佢笑言：「幾深印象一次參加比賽，我都比平時早到場約20分鐘左右，但去到報到時，工作人員卻話賽事即將進行，原來當日流程快咗，所以雖然早到，但都係遲咗⋯⋯下次要再早啲到。」

今次節目中測試化妝品，不過佢就話平時好少化妝，喜歡最自然嘅感覺，有時工作需要至會化妝，反而有另一樣一定會用：「搽防曬，其實紫外線長年累月下好傷皮膚，所以一定要留意，男仔特別係耳仔邊、面珠、後頸膊頭。」另外，朱仔話即將會開拍一部具挑戰性嘅電影：「新戲角色要跳舞，所以最近都有學跳社交舞；另有個project需要講異地口音，希望好快有新作送畀大家。」

精選娛聞，喺晒《娛果》
http://fb.com/appledailyent