任達華跟林嶺東合作無間，不時相約見面，華哥晚上得悉好友猝死，他非常傷心，華哥在電話中回應：「我每次返香港都一定聯絡，我同佢家人都相熟，剛通咗電話，有需要一定協助幫手。呢個消息好突然，兩個月前先同佢見面，佢當時好健康，佢平時生活習慣好正常，又冇乜嘢病。」

華哥跟林嶺東相識數十年，華哥表示仍未可接受這個死訊：「好難過，接受唔到。人生無常，珍惜眼前人，希望佢一路好走。」

另外，與林嶺東同是無綫1974年第三期藝員訓練班同學的盧海鵬，對於林嶺東離世，鵬哥大感愕然，他說：「吓！佢因乜事走呀？佢平時拍嘢先至勞氣嘅啫，佢又好少應酬，淨係得閒同老婆去下旅行。我大陸有個學生最近又係無端端喺屋企心臟病走咗，好突發，又係60幾歲之嘛！」鵬哥憶述：「佢當年訓練班出嚟好快有套劇做過主角，我做山寨二當家，冇幾耐佢就走咗去做PA跟天林叔（當年無綫監製王天林），佢（林嶺東）同阿杜（杜琪峯）兩個都係好早由藝員訓練班轉做PA跟天林叔，所以阿東同阿杜兩個感情好好。不過佢（林嶺東）之後做電影，我都冇同佢再合作啦。」

據悉杜琪峯與林嶺東相熟，當林嶺東是大佬，十分尊敬對方，林嶺東曾形容杜琪峯從不駁嘴。兩人每月見面，兩周前才一起食過飯，行得走得，未能接受死訊。

譚詠麟回覆《蘋果》時：「林嶺東係同我拍過《陰陽錯》、《君子好逑》，佢突然間咁樣……真係好突然，真係好震驚，真係好可惜，佢要求啲嘢同第二啲導演係唔同，佢個人火爆啲嘅，要求啲嘢比較另類啲，一個普通嘅鏡頭，佢要你逼吓逼吓逼另外一樣嘢出嚟去符合佢。佢係一個有要求嘅導演，唔係一個簡單嘅導演，有佢自己風格，亦都聽到佢籌備緊套戲，上次我哋成班人有個飯局，麥嘉、石天、黃百鳴、張艾嘉、施南生等等，我見到佢冇嘢吖，好精神，真係電影界一個損失。」