台灣名模林志玲今晚現身灣仔會展出席「2018愛心獎頒獎典禮」，獲大會頒發愛心獎座，兼得13萬美元（約101萬港元）獎金。着住白色露肩緊身晚裝嘅志玲姐姐，由於件衫實在太緊身關係，搞到肚凸凸，但其實佢身材都仲好fit嘅！

講到得獎感受，志姐姐姐話：「對我來說，這是最有意義的獎項，過去七年參與慈善工作，初時也感到徬惶，現在找到了方向，我有堅定的信念。」佢仲話會將得到嘅獎金，全數捐去兒童教育同醫療機構，而佢自己喺大陸嘅四川同寧夏，都有10間「志玲姐姐兒童之家」，每間大約有2至300個小朋友，盡量為佢哋做好基本生活需要，未來亦會繼續做探訪工作。

上個月踏入44歲嘅志玲姐姐，感情方面仲未有着落，外界都好關心佢幾時嫁得出，事關連41歲嘅「敗犬女王」楊謹華都宣佈同圈外男友Ben結婚。講到呢個問題，佢即笑住話：「你們比我還心急，知道大家都很關心我，現在開始我也要對關心自己，但還未有對象，明白時間要創造出來，要有多些私人時間。」問到會唔會減少工作，爭取時間拍拖？佢就笑話要拍拖都要有對象至得，不過都好戥楊謹華開心。怕唔怕成為「敗犬No.1」？志玲尷尬話：「沒想那麼多啦！不會擔心，單身女生也很多，我也會享受獨處的時候，當然也期待兩個人的幸福。」

精選娛聞，喺晒《娛果》
http://fb.com/appledailyent