華華近日上開facebook，唔知係咪搜尋得「李嘉誠」3個字太多，噚日突然彈咗單sponsored廣告出嚟（見圖），首先個post就貼咗誠哥嘅大頭相，英文標題就話「當局正搜捕佢」，原因係爆咗啲公眾唔應該知嘅神秘資訊。

雖然個page名（叫skin disease）同埋條link都假到爆，咁華華都照撳入去睇下有咩神秘資訊啦，點知入面就好似一份訪問稿咁，除咗有誠哥，仲有大台主播張文采，「訪問」內容大致上係話誠哥發現到一個「財富漏洞」，只要用咗呢招，3至4個月就會變咗百萬富翁，係咩咁把閉呢？原來就係一個加密貨幣自動交易程式。

翻查資料，從來未聽過誠哥有投資加密幣（加密幣相關嘅start-up就有），明顯地呢個係一個借超人名義去搵食嘅fake news騙局，真係同近排藍絲網站嘅假新聞有得fight。

華華問過facebook啲人，得出嘅都係話可以舉報呢類帖。其實近排比特幣價格翻生，喺每枚1萬美元徘徊，可能真係有機會呃到人，唔知facebook有冇更好嘅政策杜絕呢啲擺明呃食嘅廣告呢？

李華華