噚日睇財經新聞，最矚目嘅除咗係澳博（880）招股，相信就係商品交易所成立，細May噚日一睇到呢單新聞，第一時間就嗌，「敏妮，港交所（388）唔係獨市喇！」其實，早喺輝立證券高調推廣佢哋個新盤暗盤買賣服務之後，敏妮已經講，港交所唔係獨市，何況商品期貨呢一瓣，港交所亦冇專利權，根據現行法例，港交所只係股票交易有專營權，至於畀人有港交所獨市嘅錯覺，只不過係「瘦田冇人耕」。

講番商品交易所成立，好多人都歸咎係因為港交所做得唔好，所以港府引入競爭。睇真啲，呢個似政治問題多過金融運作問題。敏妮對政治興趣有限，除非涉及到銀包入面嘅錢。不過，噚日有報道將商品交易所同港交所，形容為大衞與巨人哥利亞，咁大衞講嘅就梗係商交所啦，至於哥利亞就係港交所。細個聽故事都知大衞用一粒石仔打低哥利亞，至於商交所會唔會砌低港交所？呢個就係細May大嗌嘅原因，「敏妮，港交所又俾大行唱淡，今勻又遇着競爭，你會唔會轉吓個月供投資組合，唔再供港交所呢？」

首先敏妮之前已經講咗，考慮調整月供股票嘅投資策略，供多一隻股票，希望分散風險兼增加回報，至於港交所，敏妮相信佢仍然會再調整，所以供喺港交所嘅金額會縮減，但仍然會繼續供。敏妮覺得，睇淡港交所都係因為個市唔得，令成交縮減，至於競爭大呢個問題，除咗𠵱家已經面對緊嘅競爭，講到嚟自商交所嘅挑戰，敏妮覺得仲係言之過早。
始終商交所係私人公司，就好似輝立個暗盤市場咁，就算做到家吓街知巷聞咁成功，但做完第二日都要喺港交所上板，港交所仍然有錢收。睇報道，商交所搵倫敦清算所結算服務，雖然佢已經得到港府「祝福」，成立時有財政司司長曾俊華拍番段片祝賀，但呢家交易所開張時都未獲證監批准，又唔知股東同董事係邊位，開舖都咁多甩漏咁唔完善，似乎有啲馬虎噃！

http://wanmanli.com/blogs/