一班梅艷芳歌迷最近喺太子搞咗個「那些年‧我們一起追過的梅艷芳」紀念展，由今日起至後日（31日）舉行，場內展出梅姐參演嘅電影《賭霸》海報、電影劇照、電影錄影帶、限量版一套15款嘅Yes! Card、演唱會海報等等，場中更放有一幅梅姐人形紙牌坐喺煤氣燈街嘅大型海報，而今個展覽製作費大約5位數字。

擔任展覽開幕嘉賓嘅江欣燕（欣欣），佢表示：「好似返番去8、90年代，好多回憶！」受訪時，欣欣透露當年讀中四，有幸去睇《勁歌金曲》總選，「梅姐着住白色西裝唱《夢幻的擁抱》，我跟住我搵陳百強同哥哥（張國榮）影合照，再趁住廣告時段搵梅姐合照，但點知我被地下條cable線kick到，當時哥哥見到就同梅姐話『佢拜你喎！』，梅姐叫我『你企番起身先』。後來我入咗行，同梅姐同一間公司，我同佢講番，佢話唔認得邊個，但記得呢件事。」欣欣指呢3張合照係最珍貴嘅珍藏，現保存於家中。

講到同梅姐嘅點滴，欣欣話：「梅姐嘅《巴西熱浪嘉年華》（音樂特輯），我有份飾演記者，我哋相處咗14日；梅姐好錫屋企人，有次帶埋我去梅媽嘅生日會，當時我已經喺《EYT》扮梅姐，所以我好驚梅姐嘅歌迷會打我，但原來佢哋對我好熱情；有次喺化妝間見到梅姐，佢問我做咩，我話補妝去拍拖，但係梅姐話應該落妝，以真面目去拍拖。」

芳心薈副會長Eva指梅姐已離開15年，佢哋成班歌迷好想讓年輕一輩知道，佢哋當年追星嘅那些年，「我由梅姐選新秀已經開始跟佢，一直儲咗好多剪報、雜誌，今次會拎出嚟分享，仲有義賣，10蚊一張相、2蚊一張Yes! Card，全套有15張，扣除成本，收益會捐去慈善機構。」

精選娛聞，喺晒《娛果》
http://fb.com/appledailyent