金融界嘅關係從來都係千絲萬縷，成日都估佢唔到！講緊嘅係內房股佳兆業（1638），呢隻股停牌兩年，今年初復牌，大股東兼主席郭英成個仔郭曉群向來極之低調，未曾公開露面，不過郭曉群本月竟然高調地密密喺市場掃入康宏環球（1019）股票，最新持股量去到16.44%，靜雞雞變成康宏主要股東。

斥資4億　持股逾16%

根據聯交所資料，郭曉群本月14日因增持康宏，持股量一下子跳到9%，令持股情況首度曝光，佢跟住連日增持，最新持股量係16.44%，粗略計算，佢斥資約4億元買入呢批股票。
康宏主要提供理財服務，郭曉群做內房，兩者有乜關係呢？「玩具大王」蔡志明唔知關唔關事呢？睇番資料，今年2月，佳兆業郭氏透過場外交易，令蔡志明揸住佳兆業超過5%股票，佳兆業3月就終於復牌。
蔡志明現為康健國際（3886）副主席，至今做咗11年，康健創辦人係曹貴子醫生，曹貴子同時係康宏執行董事，年初持股約5%，之後不斷減持。
睇到呢度，大家應該都暈暈哋，唔緊要，金融市場係有好多咁啱得咁橋，可能佳兆業太子爺郭曉群忽然睇好理財呢行，所以咪衝入市買囉。佢爸爸郭英成今年初曾經提起過佢，指郭曉群喺佳兆業工作，但偏愛搞科技喎。

李華華
mailto:[email protected]