今日阿Sa(蔡卓妍)同張智霖(Chilam)，今日喺《蘋果》娛樂直播節目《今日ENT》同大家開live，網民問到阿Sa會唔會有住酒店嘅禁忌，佢就話：「我要好黑同好靜，黑到少少光都唔可以，多數都會戴眼罩瞓覺。」

Chilam就大讚阿Sa好大膽，阿Sa即話：「睇相佬話我唔容易見到。」Chilam搞笑話：「真係睇相佬點你十年八年。」網民又問Chilam瞓酒店有冇咩禁忌同習慣，佢就話：「我都係要好黑嘅，又唔會話入門口前要敲門。」咁阿Sa又會唔會敲門呢，阿Sa話：「通常都係我助手入先，有時去到有啲酒店，有啲聖經會打開咗，不過我唔容易見到。」

網民又問佢哋有冇遇過咩怪事，阿Sa就話：「我見過有一次，行緊去自己間房，對面房係有啲鐵鍊鎖住咗，好得人驚，就係嗰間啲酒店聖經打開咗，嗰晚要同Joey、阿嬌同埋助手一齊瞓。」

網民又問到之前阿Sa都同邱禮濤導演合作咗幾次，今次拍鬼片會唔會有咩唔同，阿Sa：「我覺得佢真係多才多藝，我次次拍嘅都唔同提材，真係好勁，我都好多謝佢睇得起我，畀我可以演咁多唔同嘅角色，基本上同導演都建立咗一個好深厚嘅友誼，其實我都唔係好睇鬼片，佢問我接唔接，我都因為係導演所以接咗。」