珠江船務（560）點秤都抵買，呢期跟個市質落嚟，昅昅。珠船主打珠三角貨運及客運業，今年上半年全世界嗌晒救命時，集團2012年度中期實際純利仲有7%增長，達7000萬銀。隨住下半年受惠節日因素刺激，客運業繼續好景，相信全年度業績繼續Good fit。好保守計數，珠船下半年如果睇齊上半年度，2012年度（12月底止）純利已經可以上1.4億銀，唔計上年非業務性因素，實際純利增長過30%，預期PE仍然喺7字頭單位數。再講，珠船最新NAV 2.2元，折讓過40%，喺同業中亦算係吸引。呢轉大市又有少少飄搖，珠船再跌，吼實1.16至1.13元個橫行底收集，中短線以2012年度預期PE 10倍做目標，講緊要升四成到1.60元，目標PE一啲都唔貴。

中國風電博短打

中國風電（182）主打風力發電，係祖國重點支持嘅環保潔能瓣數之一。隨住呢期祖國新領導班子上場，短期焦點，又放喺有冇新一輪嘅政策措施，潔能股分分鐘隨又嚟過。再講，中國風電最新NAV 0.6元，現價（0.237元）既折讓高達60%，潔能股當中又係吸引之列。呢轉短打博升兩成到0.284元，中國風電未有耐上到NAV。

錢雋