黑麻麻睇星星 LGG7030玩浪漫
雖然流星雨熱潮已過,夏天又成日打風落雨,不過想睇星星都唔係冇辦法,皆因LG繼前作G8000大玩多媒體影音之後,今次一於帶大家回到大自然,新作G7030將十二星座搬入手機,配上全港首部用上OELD物料的外屏幕,隨時隨地都可以睇星星,情侶們同另一半一齊睇就更加有氣氛喇。
記者:劉耀祥 攝影:陳智良
ImageGirl:Kate
LGG7030Profile
制式:GSM900/1800
顯示器:外屏幕:256色OELD/96×64像素;內屏幕:65,000色UFB/128×160像素
功能:GPRS、WAP、EMS、40和弦
備用時間:約200小時
通話時間:約150分鐘
體積:87×45×25mm
重量:89g
LG查詢:26361123
銀黑色的G7030乃LG首部用上256色OELD(電子有機冷光)外屏幕的手機,未開機都已經與別不同,開機後黑色底色的OELD屏幕馬上有五顏六色的字體顯示,時間、電源、接收信號及所用網絡一一呈現眼前,在漆黑的背景下顯得特別搶眼。
星座動畫夠浪漫
一眾手機訊息「稍作休息」後,便立即由下至上轉個不停,未知是否OELD特性,小記曾接觸另一廠牌的OELD屏幕手機,同樣都會轉個不停。當按下機側的音量鍵後,首先會出現日期,再按就會出現戲肉──星座圖,睇住逐粒星星用線連起,最後再出現所屬星座的圖樣,都幾浪漫。內置12款星座動畫供外屏幕播放,用家可以選擇單一星座或隨機播放所有星座圖,當然除星座之外亦有其他款式動畫,就算唔睇星都唔怕悶。
機外機內兩種風格
LG於G7030上唔單止屏幕鍾意玩Color,就連機身都唔放過,今次共有藍銀、銀黑及紅銀三款,大玩顏色Mix&Match,用雙色配搭的G7030比一般摺機更突出,其中銀黑G7030揭開後以全「黑面」示人,對比之下令65,000色內屏幕相當光亮。按鍵則按照一貫韓風手機風格,四方向鍵再加兩個快速鍵,兩個快速鍵設定為鈴聲及開啟錄音,可惜用家不能更改,若果較少用的話就浪費兩個按鈕了。
G7030亦與以往LG機一樣,隨機附送電腦程式,用家可以從電腦中自製鈴聲及圖像,慳番唔少Download錢。
機面睇SMS啱懶人
LG將OELD屏幕玩得淋漓盡致,除了睇星星之外,實用性都一樣兼顧到,因為當有SMS的時候都一樣可以從外屏幕觀看,毋須打開手機都知道SMS講乜,連中文都可以睇到,對「懶人」用家實在體貼周到,若果身處戲院等黑暗地方都唔使打開個65,000色彩芒「燦」親人,不過使用上就要眼明手快,皆因必須要收到新訊息時馬上按音量鍵先睇到,如果唔係都係要乖乖打開機CheckSMS。G7030同樣支援EMS,不過就未可以在外屏幕上直接收睇,當然又有圖又有字,梗係用番個「大銀幕」睇先至最傳神。