三月二十三日馬場舉行打吡大賽,眼見會員席入場人數比平時多,打吡叫做有啲刺激作用。打吡賽日好多兩倍左右嘅大熱門,精英大師、喜勁寶、電子麒麟、勝威旺、雀躍都分別勝出,只有一隻五戰不敗嘅「步步速」,一點幾倍竟然倒灶跑第四,而左丁山偏偏就全日最大注買落呢隻馬度,輸到條氣都窒晒。到咗公布第九場,左丁山照《蘋果貼士》買「勁歡騰」,只見大摩馬房隻「勝利來」搏命落飛,好似贏梗咁款,好彩,「勝利來」去到終點以為會贏之際,影相輸條頸畀「勁歡騰」、「必得勝」、「紅旗飛揚」,跌落第四,投注此駒身上者,乜都輸晒,有馬迷大呼好好好!「步步速你都輸得,呢場你就落飛想食晒,抵死!」至於「你」係邊個,大家心照咯,左丁山中番「勁歡騰」補數,自然心涼。