亞姐出身嘅名媛羅霖周日帶同愛子,參觀設喺尖沙嘴嘅何文田豪宅君頤峰示範單位,佢話物業座數唔多,地勢高,景觀好,但強調今次純粹嚟睇吓,又話自己好鍾意睇樓,之前重曾經考慮過考經紀牌㖭。
之不過,據可靠消息講,羅霖對君頤峰一千七百呎,同二千呎單位最有興趣,佢屋企人早幾日已經嚟睇過樓,佢就第一次嚟,唔知係咪家人叫佢幫吓眼呢?
當被問到點睇樓市,羅霖回應,未來一年都唔會有咩好轉,不過,如果自住唔係炒樓就應該冇問題。至於政府可能減釐印費,她認為,對樓市幫助唔大。
張炳強參觀行家新盤
另外,恒基地產營業部總經理張炳強,噚日下晝同助手一齊參觀上環ManhattanAvenue示範單位,大讚物業樓底高十呎、位置好、間隔又好,逗留咗半個鐘至走。
廖偉強任務完成去散心
近排新盤開售少咗啲,樓市稍靜,代理乘幾放假鬆一鬆,費事有盤開時行唔開。利嘉閣董事廖偉強今日就舉家出發去日本旅行,周末至返港,聽講佢以前已經去過日本好多次,對當地景點應該好熟悉。
廖生喺舊年十月過檔利嘉閣之後,一個禮拜返足七日工,每日超過十二個鐘,今次係第一次放假,佢咁安心出門,睇嚟利記嘅改革都應該完成,公司運作暢順。
另外,利記董事總經理何紹章,據聞今個月底,會去廣州行個圈,充吓電食吓嘢。
細價商廈大上大落
寫字樓價跌咗幾年,差唔多到咗見底嘅階段,但係造價就冇晒標準,特別係啲幾十萬嘅單位,卓先測量師行聯席董事潘子明話,最近旺角就有啲寫字樓買賣,同一座大廈,售價喺一兩個月內相差十幾萬,由三十幾萬大升到近五十萬,升值六成。佢話,既然造價咁低,預期後市有條件反彈。