毛記葵涌終於走向上市尾段的大直路，撞正誠哥同日公布退休，一代的大商人退場意味一個時代的終結。腦細林日曦facebook寫的那段自己「loser到走向成功上市」的感言，感染力大到多人轉載，我也不停重溫。睇住一個失敗者努力拼博，好睇過一個成功商人高位引退。誠哥跟年青人距離太遠，反而林日曦更能引起我輩共鳴。

要不是蘋果記者朋友無禮地問誠哥和周小姐的關係，只怕個記者會我悶到訓著，無禮是無禮，但記者問出娛樂效果來。個人也不直接認識腦細，只是網絡上會吹下水相互PM留言，我口頭上答應過會幫他寫的新書，到現在一隻字都未寫，走數味極濃，誠信逼近破產。不過無緊要，香港今時今日無乜誠信的人會混得比較好，我只是向這班「偉人」致敬而已。

林日曦讀書不成，放棄中國市場靠自己創意打拼出一片天，局限下發揮到極致，做媒體的、做廣告的睇佢唔起，然後現在他一手掃掉這班迂腐老屁股的眼鏡。睇到世代鬥爭出現贏家，睇住老屁股酸葡萄敗走的狼狽相，我真係好爽，開始感到世代有點靠近他這一代人。

網絡也跟KOL健吾、盤菜瑩子講起如何抽新股。利益申報一下，純粹當個案討論，千祈唔好因為我提過就入飛抽新股，然後入我數。事實上，現在首日公開發售已超購過千倍，毛記已經順利集到應有的資金，很大機會問鼎今年超購倍數王。再入飛反而中籤率不高，借孖展抽反而蝕息，就算全家人頭戰術去抽都未必咁易中，我未入飛，反而想做旁觀者多一點。

抽新股硬技術不能掌握，有用開的經紀行的，問一問就幫可你代勞。如果是銀行客戶，可能要用去銀行開股票戶口，然後網上自己落飛。硬知識不算難掌握，心態才更重要

我見到有人會質疑毛記盈利生意倒退，仔細分析報表再決定落唔落飛。多鬼餘，而家係抽新股啊，睇死大家咪又係第一日見高開就搵位沽貨。換言之，這不是投資，而是博彩性質的抽獎遊戲，你睇基本因素、財務報表托咩，咪又係搵吹毛求疵的小錯，然後借勢攻擊毛記廢之類。唔好呃自己，幾多人會做長情股東，大家都係想玩新股賭供求的博奕遊戲。

就算是偏近毛記的意識形態或政治立場，都不一定代表金錢上支持毛記股票的炒作。舉個例，希望肥佬黎黎老闆唔好介意我大言不慚，查實香港夠近一半人支持壹傳媒的意識形態和政治立場，咁又有幾多真係壹集團的股東先，對不？誠實面對自己內心，誠實面對自己荷包，你入飛抽毛記，都係想贏錢居多。

我當然支持毛記，但客觀講今次資本遊戲的值博率不高，毛記已超購千倍，抽中股份機會不高，也用不住我股票場內課金支持。我支持毛記，方式也很多，例如執筆寫書，買林日曦著作，然後等四月睇我偶像東方昇表演特異功能都得。

蘋果財經，關心你飯碗
http://fb.com/appledailyatm