潮興暖男，不是身形給你溫暖那種，而是生活細節夠體貼，對女性無微不至。根據Google大神，暖男特徵多籮籮，如出手幫女仔提手袋、綁鞋帶等。自從暖男風潮席捲亞洲，不少男性朋友都感到壓力。做暖男，驚被人歧視，倒瀉「樽鹽」；拒做暖男，又滿足不到女伴對暖男的憧憬。做與不做之間，進退維谷！社交網絡成日傳，要點點點做先變成暖男，獲取芳心，跟住清單照做？

女人有手，可以自己提手袋，看似是男人主觀想法，但現實中不少女性相信，暖男不一定要這樣做，甚至覺得，圍着女生團團轉的終極暖男「幾難頂」。任職助理傳訊主任的Victoria，試過和暖男分手，部份原因正是對方做得太過頭，她和現任男友Steven關係較對等，對方不會刻意在生活小節上幫忙，反而相處得更舒服。有時二人走在街上，看到男方對女伴太體貼，例如蹲下綁鞋帶，反而會「食花生」，齊齊暗笑。

Victoria說：「其實冇人時時刻刻都係暖男，人有情緒，成日對你咁好，都幾假。」除非Victoria提着重物，否則Steven不會幫她拿。「佢都有暖男嘅一面，有時返工之前，會煮好飯，送到地鐵站畀我lunch食。但我覺得唔可以叫佢做暖男，因為佢有唔好嘅一面。」男女拍拖，總遇上女生購物，男生等候的情景，相戀兩年，二人逛過不少內衣店，但Steven並不覺得難堪，或者有損尊嚴，「我係陪女朋友入去，又唔係變態，唔會介意其他人眼光。作為一個男人，我覺得呢啲事唔會有損尊嚴，我將尊嚴放得更大，建築在事業上。同埋我好識得表達自己，同女友無所不談，如果唔想做一件事，同對方有分歧，我會講出聲，唔會啞忍。」

記者：彭海燕