電視廣播有限公司行政主席梁乃鵬，早前曾表示要培育TVB大家庭文化(TVBfamilyculture)，仲推出咗四樣嘢：第一樣要藝員受到尊重，第二樣要有合理工作時間，第三樣要有合理薪酬，第四樣要有機會演出。

而喺合理工時方面，梁乃鵬仲話要立即實行，好多藝人都有回應事件，好似民選港姐陳凱琳就話：「咁係好，休息多咗，好啲精神工作。」無辦法啦，咁多離開咗無綫嘅藝人都有狂呻，所以無綫點都要做返啲嘢，去建立返個形象。

無綫處境劇《愛．回家》收視都算唔錯，所以Keep住添食再添食。而劇中演員郭少芸今午喺微博貼咗一張《愛．回家》嘅劇本相，仲打咗句：「做功課。」

隔咗唔夠半個鐘，少芸又再貼相，相中有一杯咖啡同一張通告，仲有感而發咁打咗句：「情何以堪。」但留心睇下相中通告時間，係寫住09-22，即係由朝早9點拍到夜晚10點，足足有成13個鐘頭喎。

咦﹗等等先，之前梁乃鵬唔係話要有合理工作咩？13個鐘頭係唔係合理呢？根據梁乃鵬所講合理工作嘅定義係咁嘅： 「0依家工時係一更過，每更唔超過十小時，可以加到11個鐘，如果超過11個鐘就要總監批准，拍外景就一更可以超過12個鐘，如拍到14個鐘就要得到監製批准。」

咁如果郭少芸係拍廠景的話，就超過咗梁乃鵬所講嘅「合理工時」，但有可能係外景嘛；如果係外景的話，咁都好巧妙喎，外景可以超過12個鐘，但過14個就要總監批准，咁今次郭少芸份通告就係成13個鐘，唔過14個鐘，但又啱啱過咗12個鐘，真係完全冇問題喎。問題反而係，使唔使用到咁盡啊？不過又可以諗下，《愛．回家》有冇咁多外景要拍呢？

其實郭少芸雖然人在無綫，但係睇返啲蛛絲馬跡，可以睇得出郭少芸係有支持發牌。好似之前拍無綫嘅「愛回家」招攬舊員工片段，郭少芸雖然有份拍，但係就全程坐係劉丹隔籬冇講過嘢。

之前喺微博郭少芸分享咗一張黃日華囡囡黃芷晴好多人喺政總支持發牌集會嘅相片，郭少芸仲話：「能不感動麼？」另外佢又轉貼咗著名監製鄧特希一篇撐發牌同要求政府交代唔發牌細節文章，並回應道:「Can'tagreemore」。

以上兩條線索，真係令人覺得郭少芸係支持發牌嘅，但係唔係真，就要佢本人先知。