杜德偉（Alex）今日喺台北舉行新專輯《起來》發佈會，老婆李曉冰（Ice）同囝囝Alex Junior（AJ）總動員去撐場，AJ仲打扮得好可愛。首度擔任專輯監製嘅Alex，總共用咗5年時間籌備加製作呢張新碟，佢笑話：「體會到懷胎10月嘅感覺，但係呢個胎懷咗5年咁耐，今日終於等到呢個發佈會，好似有種辦喜事的感覺。既然辦喜事，當然想請想見到嘅人嚟，今次嚟到台北，其實有位我好尊敬、好似親人嘅朋友邱瓈寬，為我發佈會畫龍點睛。」

新專輯名《起來》，原來背後同囝囝AJ有關，Alex指「起來」係代表離開Comfort Zone：「日常生活好想喺自己最舒服嘅圈入面，但係要得到成就、突破自己，就一定要離開舒適圈，先會得到更多驚喜、成功，達到理想。呢個方向由始至終都係諗住個仔去做，因為將來長大成人，當佢人生迷失方向時，希望佢聽呢張唱片嘅歌，會搵到方向同正能量，因為自己唔係永遠喺佢身邊。」

Alex同AJ喺現場一齊睇MV發佈，佢話有囝囝陪感覺好溫馨，同時亦要多謝老婆，而且好想再生小朋友，佢笑話：「生孖胎就最好，可以收工。」

而寬姐就以神秘嘉賓身份現身記者會，佢哋30幾年前因合作音樂而認識，Alex笑話本來想請寬姐着裙、魚網絲襪、高踭鞋出席，但最後都係唔敢提出，而着住橙色衫現身嘅寬姐笑話：「今天已經跳出了comfort zone，平日我只穿黑色，媒體都沒見過我穿其他。」

精選娛聞，喺晒《娛果》
http://fb.com/appledailyent