市面不景,好多酒樓啲團年飯、春茗預訂都比較靜,新年都唔會帶旺市。
想唔到嘅係,報紙竟然亦會減價。唔係報館自己宣佈減價喎,而係沙田第一城一間新開嘅便利店減價。據沙田陳師奶話,沙田第一城有兩間七十一,現在CircleK加入戰場,為咗搶生意,店內嘅報紙竟然賣五皮,唔係六蚊。店內最暢銷嘅自然係兩大報,由於只售五元,經常賣清光,其他報紙就慘咯,剩紙一大堆,既然CircleK報紙賣五蚊,第一城內嘅幾個報攤生意受到影響。陳師奶話:「𠵱家啲人真係逐蚊逐蚊慳㗎,慳得一蚊就一蚊,朝早搭地鐵就知,以前最多人揸住張《蘋果》上車,𠵱家就多數手空空,到咗地鐵站就攞張免費嘅《都市日報》,一到站落車就放低張《都市日報》行人,製造車廂垃圾,益咗啲清潔阿嬸有工做。」