噚日係沙田馬場天幕馬匹亮相圈正式啟用嘅大日子，加上香港馬王「精英大師」復出，今季首度披甲，唔少達官貴人馬主都派出愛駒參與賽事，湊湊熱鬧。
其中財爺唐英年同立法會秘書長馮載祥可謂歡喜冤家，唐唐名下嘅「富士晨曦」上月三號國慶賽馬輕取馮載祥嘅「哈哈霸」，噚日又狹路相逢，今仗輪到馮載祥威番次，「哈哈霸」以短頭擊敗「富士晨曦」，六點五倍掄元。
「哈哈霸」嘅練馬師李易達賽後透露，佢同馮載祥都係皇仁仔，李易達話當馮載祥得知佢今季取得香港練馬師牌照後，將「哈哈霸」拉去佢個倉，因此非常感激校友支持，如今終於取得轉廐後第一win，感到十分欣慰。其實上一場馬主都有言在先，等埋馮太Jenny由雅典返嚟，先拉頭馬，畀晒貼士。
噚日沙田馬場重出現三位專程嚟取經嘅稀客，就係武漢市副秘書長石大鴻、體育局黨委書記劉沛及商人胡越高，佢哋對於沙田馬場各項新舊設施，俱讚歎不已。石大鴻希望日後武漢馬場能夠興建同一類亮相圈，武漢馬場將於明年農曆年期間開始，每個禮拜舉行兩次賽馬。


傳真︰2623-9278
電郵︰[email protected]