論資排輩，1968年開業的銀都冰室，絕對手握龍頭枴杖。「阿妹，菠蘿油！」街坊來到，隨即大大聲落柯打，「好呀！今日咁晏嘅？」一位30來歲的女子架着一副眼鏡，陰聲細氣的與一班叔伯寒暄着。她是冰室第二代傳人阮少儀，擁有工商管理學位，明明可在冷氣房當OL，卻選擇進入熱廚房，每天回來夾麵包、沖奶茶，「如果唔係屋企人，我唔會咁樣做，見到佢哋（父母）咁辛苦，自己都唔開心」。
老父年逾八十，2007年退居幕後，只間中出現，與街坊敍舊打牙骹，「呢部算盤就係佢嘅，次次返嚟就坐喺度『躂！躂！躂！』」

食客鍾愛舊餐單

年輕人心裏總有一團火，接手初期，阮少儀萌生改革裝修念頭，「朋友話千祈唔好，呢個係特色，但我覺得好老土！」其後推出mocha，結果慘敗告終，「好花巧嘅餐牌，新嘅食物，係無用㗎！個個都係飲番奶茶咖啡，食菠蘿油」。結果只把牆身漆成黃色，只為「襟污糟」。除午市迎來一批中學生，為老店略添生意，其餘時間，食客一半以上是花甲老翁。
年紀輕輕，卻留在此老態龍鍾的夕陽冰室，也許，旁人認為此舉算是犧牲，於阮少儀來說，冰室帶給她的，都是人生中最珍貴的禮物，除了養大阮家五姊弟，更讓她認識一生最愛，「佢喺呢頭返工，初初係為咗食物，後尾應該為咗見我，哈哈！」二人2008年認識，前年踏上紅地毯。
對於重建，阮少儀舉腳贊成，冰室於華富邨落成時誕生，亦將於華富邨消失時走進回憶，「咁辛苦，而且出面舖租貴，得個做字，唔開喇！」