【新增動新聞】
早排特首林鄭扮少女，以一身紅裙襯黑絲，再斜孭Ferragamo袋現身公開活動，令唔少人「挖目」相看後，民記「元秋」蔣麗芸今日亦以一身夏季限定look現身立法會，令唔少記者睇到嘩嘩聲。元秋今日除咗同林鄭當日一樣，揹起一個細細少女feel黑色斜揹袋，更加紥起唔算長的頭髮，仲襯一身黑褸、黑褲、黑涼鞋，再配上一對令人意想不到的肉色絲襪！

元秋透露，當日見到林鄭個用斜揹袋時，驚覺同自己一樣，笑言：「佢（林鄭）仲著條娃娃裙，嚇到我暈咗！」元秋話，自己今日新look現身，除咗因為天氣熱，亦因為放假，所以想著得輕鬆啲，大讚用斜揹袋出席酒會勁多好處，「可以一隻手飲嘢，一隻手同人握手」。

雖然元秋轉咗呢個特別Look，但佢話老公並唔發覺，話兩夫妻相處一段時間後，唔只連髮型轉咗唔察覺，有時連朝早未擦牙洗面都唔知，「就好似左手同右手間的感覺，已係變咗一個人」，會覺得無論對方變咗乜樣，都一樣會欣賞，「最重要係個感覺」喎。

向來愛國愛港的元秋又透露，最近放假主要留喺屋企煲人氣美國電視劇《Game of Thrones》（權力遊戲），「我好威呀，人哋五季，我用兩日時間就睇完咗」，透露自己為追劇，不惜一路食飯一路煲，「放假就係咁hea架嘛！」